قصة حب حقيقية بين محمود وكريستين - الحلقة الثالثة

الحلقة الثالثة

و بعدين قعدنا عند كلية التربية نتفقوا هنخرجوا فين ....
و اتفقنا اننا هنروحوا ...... المنتزة ... ياللا عشان تبقى سنة خضرا من اولها بجد ...
و بالمرة نزوروا الملك ...
ايه ياشباب بالمناسبة السعيدة دى ناويين تاكلو ايه ؟؟ قبل م حد ينطق ... اطلبوا اى حاجة غير الفول و الفلافل ... احنا ف اول السنة و الكل مكيش و بالذات انتم يا بنات ... قاعدين ف البيت طول الأجازة و م وراكوش حاجة غير انكو بتحوشوا فـ فلوس ...
ردوا عليا و قالولى ... يخربيت قرك ... اهو قرك دا اللى جايبنا ورا ...
قولتلهم : و بعدين ايه دا ؟! كل دى شنط .. حد قالكو اننا هنبات ف المنتزة ... مالينها ايه الشنط دى ... رد مصطفى : اه صحيح مالينها أيه ؟! ... ردت شيماء و قالت : مالكوش دعووة ... و كملت نجوى و قالت ... حاجات بنات انتو مالكم انتم ؟! ... رديت انا و مصطفى ف نفس واحد
و قولنا : خلاص كدا احنا عرفنا الشنط دى فيها أيه ...
و بعدين قولت لنجوى ... ياللا يا بنت طلعى و رقة و قلم و اكتبى اللى حنقولهولك ...
انا عن نفسى ... عايز 2 سوسيس وواحد جبنة مقلية وواحد كفته وواحد بطاطس بيتى بان ...
خش يا ديشا ... اما انا فعايز 2 مقلية و2 جمبرى و 1بطاطس بيتى بان
نجوى ردت علينا و قالتلنا ..
يخربيتكو ايه دا كله ؟؟ قولتلها معلش اصل احنا جسمنا بيبنى ... و يهد ... يبنى و يهد ... حاجات رجالى بقى ملكيش دعوة بيها ... و بعدين احنا مش هنقضى اليوم ف المنتزة .. لازم يكون معانا اكل كفاية ... عشان مفيش حد بتاع اكل جوا ... فهمتى يا خالتى ؟!
قالتلى : خلاص فهمت
ياللا يا شيماء ... انا عايزة 2 شاورما وواحد برجر وواحد كفته
ردت نجوى و قالت لشيماء : و انا هاخد زيك
رد مصطفى و قال ... حودة اكيد هنحتاج نهضم .. دور كانز معاك بقى ... قولتله : اوك

ياللا يا حلوين كل بنى ادم فيكو يطلع 20 جنيه ... و انا هتبرع و هجيبلكوا الأكل ... ردت نجوى ... 20 جنيه ايه ؟ ! هما 10 جنيه مفيش غيرهم و بوس ايدك وش وضهر
... قولتلها ... نعم ؟ وحياة أمك انتى فاكرة نفسك فسوق الزنقة و لا المعهد الدينى ...
قالتلى : معيش غير 100 مجمدة ... قولتلها هاتيها و هفكهالك متخافيش ...
راحت مديهالى ... اخدتها منها هى و الورقة ... و قولت لمصطفى و شيماء يحاسبوها و انا هجيب كله م الـ 100 جنيه ... بقولكو ايه ؟؟ استنونى هنا هجيب الحاجة و ارنلكو تطلعولى من عند باب تجارة ... اوك ... قالولى أوك ... و سبتهم و طلعت على مطعم هريدى ...
رحت ع الكاشير اديه الورقة يكتبها و قولتله يخلى كل اوردر لواحده
و بعدين اخدت منه الورق و اديته للى واقف قولتله جهزلى كل اوردر لواحده ...
قدامك اد أيه ... قالى : نص ساعة ... قولتله اوك ... و انا واقف مستنى ... لمحت كريستين قاعدة ع تربيزة عن هريدى بتفطر و معاها موزتين تانين ... قولت اما اروح اقعد معاهم لحد م الأكل يخلص ... و انا رايح عليهم ... حسيت انى رايح القدس ... ماعلينا من احساسى ... المهم .. دخلت عليهم ... ايه دا كريستين تانى مش معقول ؟؟! ايه خلصتى محاضراتك ...
قالتلى .. لأ بس طلعت مع صحابى هيفطرو و ندخل تانى .. انت ايه اللى مخرجك ؟
قولتلها بجيب اكل .. عشان خارجين انا و صحابى نغير جو ... قالتلى نعم ؟!
قولتلها .. نغير جو .. قالتلى .. دا احنا لسة اول يوم ... قولتلها ... احنا م بنحبوش الروتين
قالتلى ... ربنا معاك ... طبعا صاحباتها الأتنين راحو باصنلى كدا بأستغراب ...
فهى لاحظتهم ... قالتلى .. احب اعرفك بصحابى ... مارينا و بتول ...
قولتلها ... زى القمر انتو ال 3 ... الرب يحرسكوا ... ابتسموا كلهم ...
ولسة كريستين هتعرفهم عليا ... قالتلى .. اه صحيح انت م قولتليش على أسمك ؟
قولتلها معقول ... جيران و مش عارفة أسمى ... قالتلى بطل هزار بقى و قول ؟؟
و شايف ترقب .. فعيون الموزتين صحابها ... مستنين يسمعوا اسمى .. و متوقعين
اسمى يكون ... مينا ... مرقص ... متى ... كدا يعنى ....
قولتلهم .. يعنى هيكون أسمى محمد مثلا ؟!
... لا طبعا ... انا أسمى محمود ... بس أبويا اسمه محمد
و أول م قولتلهم ... أسمى .. محمود ... لقيت التلاتة .. تنحولى شوية ووشهم جاب الوان
و قالولى .....

و دا اللى هنعرفه الحلقة الرابعةـــــــــــــــــــــــــــ ــــــــــــــــــــــــ ــــــــــــــــــــــ ــــــــــــــــــــ ــــــــــــــــــــ
الحلقة الرابعة